Trajneri i Shqipërisë U-21, Alban Bushi, ka përcaktuar grupin e lojtarëve që do të jenë pjesë e grumbullimit të muajit nëntor. Në fokus të kuqezinjve janë dy testet miqësore ndaj Luksemburgut dhe Spanjës, të cilat do të zhvillohen në Tiranë.

Në listën e teknikut shqiptar bëjnë pjesë gjithsej 23 futbollistë. Nëntë prej tyre vijnë nga ekipet e kampionatit shqiptar, ndërsa 14 të tjerë aktivizohen në klube jashtë vendit. Përmes këtij grumbullimi, stafi teknik synon të shohë nga afër lojtarët dhe të vijojë ndërtimin e skuadrës për objektivat e ardhshëm.

Përballjet e nëntorit kanë një rëndësi të veçantë në kuadër të përgatitjeve për Kampionatin Europian U-21 të vitit 2027. Shqipëria, si një nga organizatoret e këtij kompeticioni, e ka të garantuar pjesëmarrjen në fazën finale dhe po shfrytëzon ndeshjet miqësore për të konsoliduar grupin.

Sfida e parë për ekipin e Bushit do të jetë ndaj Luksemburgut, më 13 nëntor, në orën 19:00. Ndërsa testi më i rëndësishëm në letër do të vijë katër ditë më vonë, kur Shqipëria do të përballet me Spanjën, më 17 nëntor, në të njëjtën orë.

Të dyja takimet do të luhen në stadiumin “Air Albania”, ku kuqezinjtë do të kenë mundësinë të matin nivelin e tyre përballë dy kundërshtarëve me karakteristika të ndryshme.

23 futbollistët e përzgjedhur nga Alban Bushi:

Portierë: Simon Simoni, Aron Jukaj, Alain Taho.

Mbrojtës: Arlind Kurti, Ervin Bashi, Omer Bajraktari, Aurel Marku, Maldin Kacurri, Fabjan Përndreca, Numan Ajetovikj, Zylyf Muça, Gabriel Ramaj.

Mesfushorë: Etnik Brruti, Ammar Asani, Ergis Arifi, Luan Simnica, Ledjo Tresa, Mattia Huqi, Dario Daka.

Sulmues: Ermir Rashica, Kevin Dodaj, Erald Maksuti, Rrok Toma.