Mali i Zi ka mbyllur këtë të premte edhe dy kapituj në negociatat me BE-në ato për lëvizjen e lirë të mallrave dhe atë për sigurinë ushqimore, politikën veterinare dhe fitosanitare.
“Çdo reformë kërkon angazhim të madh, rezultatet janë këtu. Fokusi ynë mbetet i pandryshuar, sundimi i ligjit, institucione të forta, standarde më të mira jetese për qytetarët. Ne do të vazhdojmë të punojmë fort në javët në vijim për të mbyllur të gjitha kapitujt deri në fund të vitit, në mënyrë që traktati i pranimit të mund të nënshkruhet në muajin qershor dhe të arrijmë qëllimin historik të anëtarësimit të plotë të Malit të Zi në BE në vitin 2028”, tha kryeministri i Malit të Zi, Milojko Spajic.
“Ne i mbetemi pikëpamjes se është e mundur që të mbyllen të gjitha kapitujt gjatë presidencës irlandeze, pra deri në fund të këtij viti. Kam folur me qeveritarët kroatë dhe është e qartë se ka ende disa çështje të hapura”, tha Ministri për Evropën i Irlandës, Thomas Byrne.
Lidhur me marrëdhëniet me Kroacinë, Spajić tha se do të bënte gjithçka që çdo çështje e hapur të zgjidhet në stilin evropian.
Vendimi u mor gjatë Konferencës Ndërqeveritare të zhvilluar në Bruksel, ku u mbyllën kapitulli 1, që lidhet me lëvizjen e lirë të mallrave, dhe kapitulli 12, për sigurinë ushqimore, politikat veterinare dhe fitosanitare, raporton Vijesti.
Komisioni Evropian ka prezantuar gjithashtu një plan sipas të cilit Mali i Zi mund t’i përfundojë negociatat e anëtarësimit deri në fund të këtij viti dhe të nënshkruajë Marrëveshjen e Anëtarësimit në qershor 2027. Sipas planit, gjatë nëntorit parashikohet mbyllja e pesë kapitujve, mes tyre ata që lidhen me energjinë, transportin dhe tatimet, ndërsa në dhjetor pritet të mbyllen kapitujt e tjerë, përfshirë kapitujt 23 dhe 24, që kanë të bëjnë me sundimin e ligjit.
Komisioni Evropian vlerëson se Mali i Zi ka përmbushur kriteret përfundimtare dhe pritet t’i dorëzojë Këshillit të BE-së, deri në mesin e nëntorit, projektpozicionet e përbashkëta negociuese që kanë mbetur.
Pas përfundimit të negociatave, puna për Marrëveshjen e Anëtarësimit pritet të mbyllet në pranverën e vitit 2027. Nënshkrimi i saj është planifikuar për qershor, pas miratimit nga Parlamenti Evropian dhe vendimeve përkatëse të institucioneve të BE-së. Më pas, marrëveshja duhet të ratifikohet nga të gjitha shtetet anëtare dhe nga Mali i Zi.
Megjithatë, Komisioni Evropian ka theksuar se këto afate janë orientuese dhe varen nga dakordësia e shteteve anëtare dhe vijimi i reformave. Ai ka paralajmëruar se do të vazhdojë të monitorojë përmbushjen e detyrimeve deri në anëtarësim, duke lënë të hapur mundësinë e masave mbrojtëse apo edhe shtyrjes së anëtarësimit në rast se vendi shënon hapa pas në reforma.
Gjatë periudhës mes nënshkrimit të marrëveshjes dhe anëtarësimit të plotë, Mali i Zi parashikohet të përfshihet gradualisht në punën e institucioneve evropiane, përfshirë mundësinë e dërgimit të vëzhguesve në Parlamentin Evropian.
Ministri irlandez për Çështjet Evropiane, Tomas Birn, deklaroi në Bruksel se presidenca irlandeze e Këshillit të BE-së mbetet e angazhuar që Mali i Zi të mbyllë të gjithë kapitujt negociues deri në fund të vitit.
“Presidenca irlandeze mbetet e përkushtuar për arritjen e synimit që të gjithë kapitujt e Malit të Zi të mbyllen deri në fund të vitit. Do të punojmë së bashku me Malin e Zi, Komisionin Evropian dhe shtetet anëtare për ta realizuar këtë synim”, tha ai.
Birn theksoi se vendi duhet të vijojë reformat, veçanërisht në sundimin e ligjit, pavarësinë dhe llogaridhënien e institucioneve, si dhe luftën kundër krimit të organizuar dhe korrupsionit.
